上一篇我哋用一條完整例題，將六項現金交易逐一記錄咗喺T帳戶上面，篇末亦都預告咗，當大家熟習現金交易之後，就會開始簡介賒帳交易。今篇就同大家正式介紹賒帳交易（Credit transactions）——賒購、賒銷，亦即係大家平時聽開嘅「賒數」。
乜嘢係賒帳交易 (Credit Transaction)？
喺之前兩篇嘅現金交易入面，貨品同款項係同一時間交收：一手交錢，一手交貨，交易當場完成。但現實嘅商業世界好多時唔係咁運作。供應商送貨俾你嘅時候，通常唔會企喺門口等你即刻找數，而係開一張發票（Invoice），註明你要喺一段指定時間之內——例如三十日或者六十日——支付款項。呢段由交易日去到結算日之間嘅時間，叫做賒帳期（Credit period）。
賒帳交易（Credit transaction）：交易發生時先交收貨品或服務，款項留待日後結算嘅交易。由交易日至結算日之間嘅期限，稱為賒帳期（Credit period）。
點解企業要咁做？主要原因係現金流。企業嘅資金好多時綁咗喺存貨同其他資產上面，如果每一單交易都要即時支付現金，營運會非常困難。賒帳令企業可以先攞貨品返嚟做生意，賣出貨品、收到錢之後先向供應商找數。所以生意做得越大，賒帳交易一般越普遍；相反，一間啱啱開業嘅公司，就好似我哋喺第五篇講過咁，因為未同供應商建立到信譽，多數只可以用現金交易。
應收貨款同應付貨款 (Trade Receivables and Trade Payables)
賒帳交易同現金交易喺會計上最大嘅分別，係佢會產生一段「欠住錢」嘅關係。當我哋賒銷（Sell goods on credit）貨品俾顧客，喺顧客找數之前，佢欠緊我哋錢——呢位顧客就係我哋嘅債務人（Debtor）。佢因買貨而欠我哋嘅款項，喺帳目上叫做應收貨款（Trade receivables）。呢筆錢遲啲會變成現金流入企業，係會帶嚟未來利益嘅資源，所以屬於資產（Asset），喺財務狀況表列喺流動資產之下。
相反，當我哋向供應商賒購（Purchase goods on credit）貨品，喺我哋找數之前，我哋欠緊供應商錢——供應商就係我哋嘅債權人（Creditor）。呢筆因買貨而未償還嘅款項叫做應付貨款（Trade payables），係企業目前承擔嘅責任，屬於負債（Liability）。其實債權人呢個名喺第五篇已經出現過——企業向銀行或者親友借入貸款，佢哋同樣係債權人；應付貨款專門記錄因賒購貨品而欠嘅數，同借貸清楚區分。
應收貨款（Trade receivables）：因賒銷貨品而未向顧客收取嘅款項，屬於企業嘅資產。應付貨款（Trade payables）：因賒購貨品而未向供應商支付嘅款項，屬於企業嘅負債。
仲記唔記得上一篇我哋講過，用現金進行交易嘅時候，係無需要記錄第三方嘅公司名？因為一手交錢一手交貨，交易已經係最終交易。賒帳交易就啱啱相反：喺結算之前，我哋必須清楚知道邊個欠我哋錢、我哋又欠邊個錢、每一筆各欠幾多。所以每一位賒帳嘅顧客同供應商，我哋都會用佢哋嘅名字開一個獨立帳戶——例如「陳大文帳」——用嚟追蹤同呢一方之間嘅欠款變化。
常見嘅賒帳交易
1. 賒購貨品 (Purchase goods on credit)企業向供應商購入作轉售用途嘅貨品，但暫時未支付款項。同現金購貨一樣，購入嘅貨品會記入購貨帳（Purchases）；唔同嘅係，貸記嗰邊唔再係現金或者銀行存款，而係應付貨款（Trade payables），並以供應商嘅名字開帳。
分析：
- 費用 (Expense) 增加 <借記 (Debit)：購貨帳 (Purchases)>
- 負債 (Liability) 增加 <貸記 (Credit)：應付貨款 (Trade payables，以供應商名字開帳)>
2. 賒銷貨品 (Sell goods on credit)企業將貨品售出俾顧客，並容許顧客喺賒帳期之內先找數。賣貨嘅收益照樣記入銷貨帳（Sales），而未收取嘅款項就會記入應收貨款（Trade receivables），以顧客嘅名字開帳。
分析：
- 資產 (Asset) 增加 <借記 (Debit)：應收貨款 (Trade receivables，以顧客名字開帳)>
- 收益 (Revenue) 增加 <貸記 (Credit)：銷貨帳 (Sales)>
3. 償還應付貨款 (Payment to creditors)喺賒帳期完結之前，企業需要以現金或者支票向供應商找數。找數之後，筆負債就會相應消除。
分析：
- 負債 (Liability) 減少 <借記 (Debit)：應付貨款 (Trade payables)>
- 資產 (Asset) 減少 <貸記 (Credit)：現金 (Cash) 或銀行存款帳 (Bank)>
4. 收回應收貨款 (Receipt from debtors)同樣道理，當顧客喺賒帳期之內向我哋找數，我哋會收到現金或者支票，應收貨款嘅結欠亦會相應清除。
分析：
- 資產 (Asset) 增加 <借記 (Debit)：現金 (Cash) 或銀行存款帳 (Bank)>
- 資產 (Asset) 減少 <貸記 (Credit)：應收貨款 (Trade receivables)>
留意最後呢個交易，借貸兩邊都係資產：收錢嗰日，只係「應收貨款」轉化成「手上嘅現金」，資產總額並無改變，亦唔會再記多一次銷貨。銷貨喺賒銷嗰日已經記錄咗——換句話講，賒帳交易係喺交易發生嗰日入帳，而唔係收到錢嗰日先入帳。呢個時間差係賒帳交易嘅核心概念，亦係唔少同學撞板嘅地方：如果賒銷嗰日同收款嗰日都記銷貨，收益就會重複計算。
最後補充一點：可以賒嘅唔只係貨品。企業一樣可以賒帳添置營運用嘅資產，例如向車行賒購一輛汽車，遲啲先找數。記帳原理完全相同，但兩邊嘅帳戶名都會唔同：借記嘅係汽車帳（Motor vehicle）而唔係購貨帳——正如之前兩篇強調過，購貨帳只限作轉售圖利用途嘅貨品；而呢筆欠款唔係因買貨而產生，所以唔係應付貨款，而係應付帳款（Accounts payables）。同樣道理，賒帳賣出非流動資產俾人，對方欠我哋嘅數就係應收帳款（Accounts receivables）。貨品同非貨品嘅欠款，記帳時要分開兩個名，唔好撈亂。
認識完賒帳交易嘅概念之後，下一篇我哋就會好似第六篇咁，用一條完整例題示範點樣將賒購、賒銷同埋雙方找數嘅交易，逐項記錄喺T帳戶上面；系列第九篇仲會再深入探討應收貨款同應付貨款。記得留意我哋嘅blog啦。
BAFS 依科話易唔易，話難唔難，老土啲講就係易學難精。喺「PY100」BAFS會計篇入面，有豐富 BAFS 教學經驗嘅導師將會講解你應該要識但唔識同你以為識但其實唔識既會計知識。總共會寫 100 篇，涵蓋中四至中六嘅 BAFS 會計知識，等各位需要嘅同學可以把握時間預習或者重溫。
培銳教育亦都有提供 BAFS 補習課程，由我地嘅資深導師一次過教你 BAFS 嘅知識同考試技巧，包括公開試常見題目題型同陷阱，獨創手抄 BAFS 筆記模式 (因為啲野喺曬導師個腦入面，好似個 BAFS 資料庫咁)，最後仲有大量 Past Paper 比你操卷操個你死我活。BAFS？其實唔難。
如需轉載，請電郵至 [email protected] 查詢。