上篇我哋處理咗「邊啲成本唔計」——沉沒成本一律剔走。呢篇處理返轉頭：要計嗰啲成本，其實仲分兩種，一種你俾錢嗰陣會心痛，另一種你連錢包都唔使開，但佢一樣係成本。呢兩種就係顯性成本（Explicit cost）同隱含成本（Implicit cost）。
第三篇我哋定義過，成本就係作出一個決定而放棄嘅最高價值選項。既然講嘅係「放棄咗嘅嘢」，咁就唔一定要俾錢先算數。顯性成本係你真金白銀俾出去嘅錢，有單有據，會出現喺帳目上面。隱含成本就係你用咗自己本來已經擁有嘅資源——你嘅時間、你嘅積蓄、你自己間舖——而放棄咗嘅最高價值用途。冇人向你收過錢，但你確確實實放棄咗啲嘢。
1. 顯性成本（Explicit cost）：為咗一個決定而實際俾出去嘅錢，通常叫做金錢成本。2. 隱含成本（Implicit cost）：為咗一個決定而用咗自己擁有嘅資源，因而放棄咗嘅最高價值用途。最常見嘅例子係時間成本。3. 一個決定嘅總成本＝顯性成本＋隱含成本。
攞個例落嚟數。阿May 而家喺一間公司做嘢，年薪 $280,000，手上有 $400,000 積蓄擺咗喺銀行做定期，一年收 $12,000 利息。佢決定辭職，再攞埋筆積蓄出嚟開一間小食店，做足一年。
先數顯性成本，即係呢一年入面佢真係開支票俾出去嘅錢：舖租 $180,000、入貨 $300,000、請人 $150,000、水電同雜項 $30,000，合共 $660,000。呢啲數會全部出現喺會計帳上面，佢自己心入面亦都好清楚，因為每一筆都真係走咗出去。
再數隱含成本，即係佢用咗自己啲資源而放棄咗嘅嘢。第一，佢辭咗份工，所以放棄咗年薪 $280,000——呢一年佢嘅時間攞晒去睇舖，唔可以再攞去返工。第二，佢攞咗 $400,000 積蓄出嚟入貨同裝修，所以放棄咗嗰 $12,000 定期利息。兩樣加埋 $292,000。呢 $292,000 冇人開單問佢攞，帳目上面亦都搵唔到，但佢確確實實冇咗。
上圖將一年埋單嘅數擺埋一齊。顯性成本同隱含成本疊埋，總成本係 $952,000；小食店一年收益 $1,000,000，兩者一減，剩低 $48,000。留意隱含成本嗰嚿差唔多係顯性成本嘅一半——如果淨係計顯性成本，阿May 會以為自己一年賺咗 $340,000，開心到飛起；計埋隱含成本，真正嘅回報淨係 $48,000，同繼續返工比較，佢只不過好咗少少。
隱含成本點認：1. 睇下呢個決定用咗邊啲你本身已經擁有嘅資源——時間、金錢、物業、器材。2. 再問嗰件資源本來可以攞去做咩，最高價值嗰個用途值幾多錢，嗰個數就係隱含成本。
同學最常犯嘅錯有兩個。第一，以為「唔使俾錢就冇成本」。假設阿May 間舖係佢阿爸嘅物業，唔使俾租，好多人就會將租金成本當做零——錯，嗰間舖本來租得出 $180,000，呢 $180,000 就係隱含成本，一樣要計足。第二，將老闆自己嘅人工當成顯性成本。老闆落手落腳做嘢，唔會出糧俾自己，所以佢嘅勞力係隱含成本；如果佢請個伙記，出俾伙記嗰份糧就變咗顯性成本。同一份工，邊個做，決定咗佢入邊一格。
順便同上篇劃清界線：隱含成本唔係沉沒成本。沉沒成本已經走咗，你做又好唔做又好都一樣，所以剔走；隱含成本啱啱相反，佢完全取決於你揀邊個選項——阿May 唔開舖，就唔會放棄嗰 $280,000 年薪。會隨住決定而變嘅，一定要計。
識分兩種成本之後，下一篇就用返阿May 呢盤數，講會計成本（Accounting cost）同經濟成本（Economic cost）——點解間舖喺會計師眼中賺 $340,000，喺經濟學家眼中淨係賺 $48,000，兩個數點解會爭咁遠，而考試又要你答邊一個。
詳情：DSE 經濟補習課程
如需轉載，請電郵至 [email protected] 查詢。