上一篇我哋將商業活動分咗類，睇完邊啲行業做緊咩。呢篇轉去講經營形式（Forms of business ownership）：同樣係一間茶餐廳，可以一個人自己揸旗，可以幾個人夾份，亦可以開間有限公司。三種形式喺出資、管理、責任同賺蝕上面爭好遠，考試亦都最鍾意叫你比較，解釋一種形式相對另一種嘅優點同缺點。呢篇就由最簡單、亦都最多人由嗰度起步嗰種講起：獨資經營（Sole proprietorship）。
乜嘢係獨資經營？
獨資經營就係一個人出錢、一個人話事、一個人孭曬所有嘢嘅生意。呢個人叫東主（Sole proprietor）：間舖嘅本錢佢自己攞出嚟，日常點做佢自己決定，賺到嘅利潤全部歸佢，蝕嘅時候亦都冇人同佢分擔。你身邊見到嘅街市檔、樓上補習社、屋邨嘅小茶餐廳、一個人打骰嘅網店，絕大部分都係獨資經營；喺香港，佢亦都係數量最多嗰種經營形式。
獨資經營（Sole proprietorship）：由一個人出資、擁有同經營嘅企業。1. 東主獨自享有全部利潤，亦都獨自承擔全部虧損。2. 企業唔係獨立嘅法律實體，東主同企業喺法律上係同一個人。
開一間獨資企業，係三種形式入面手續最少嗰種。你唔使搞公司註冊，冇最低資本要求，亦都唔使公開帳目；法例要求嘅淨係喺開業之後一個月之內，向稅務局商業登記署申請商業登記證（Business Registration Certificate），交埋嗰筆登記費就得。租到舖、入到貨、掛得個招牌，你就已經做緊生意。
東主同企業，法律上係同一個人
呢一點係成篇最重要嘅一句：獨資企業唔係法人。咩叫法人（Legal entity）？法律眼中嘅「人」其實有兩種：一種係我哋呢啲有血有肉嘅自然人（Natural person）；另一種係法律當佢係一個獨立嘅「人」嚟對待嘅組織，叫法人。法人可以用自己個名擁有資產、簽合約、借錢、告人同被人告——最典型嘅例子就係有限公司：公司自己係一個「人」，同班股東喺法律上係分開嘅。
獨資企業啱啱相反。喺會計上，我哋會用商業實體概念（Business entity concept），將企業同東主嘅數分開嚟入帳；但喺法律上，兩者根本冇分開過——間舖唔係法人，佢簽嘅合約，等於東主自己簽；佢欠嘅債，等於東主自己欠。
法人（Legal entity）：法律上被當成一個獨立「人」嚟對待嘅組織，可以用自己名義擁有資產、訂立合約、起訴同被起訴。1. 有限公司係法人，公司同股東喺法律上係兩個唔同嘅「人」。2. 獨資企業唔係法人，企業同東主喺法律上係同一個人。
唔係法人嘅代價：無限債務責任
正因為獨資企業唔係法人，萬一盤生意失敗，債主唔會話「間舖還唔到就算數」——法律上根本冇「間舖」呢個獨立嘅「人」，筆債由頭到尾都係東主自己嘅債。所以債主可以直接追到東主身上，追幾多冇上限——呢個就係無限債務責任（Unlimited liability）。
無限債務責任（Unlimited liability）：企業還唔到嘅債務，東主要攞私人財產去清還，責任冇上限。1. 東主嘅存款、物業、私家車都可以被追討。2. 呢個係獨資經營同合夥經營最大嘅風險。
上圖用一個例子講清楚。陳先生開茶餐廳，間舖嘅資產得 $200,000，但欠落供應商同銀行嘅債合共 $500,000。企業自己還唔到嗰 $300,000，債主唔會就此算數，佢哋可以要求陳先生攞私人存款、自住嗰層樓同部私家車出嚟填數。換句話講，佢輸嘅唔止係投入咗間舖嘅本錢，而係佢成副身家。呢個就係「無限」兩個字嘅實際意思，亦係考試最常考嘅一點。
好處喺邊？
- 成立簡單、成本低：一張商業登記證就開得成，唔使公司註冊，時間同費用都最少。
- 決策快：冇股東又冇合夥人要商量，見到機會即刻可以轉軚。
- 獨享全部利潤：賺到嘅錢唔使同人分。
- 私隱度高：法例唔要求公開帳目，同行睇唔到你賺幾多。
- 同顧客夠熟：規模細，東主親自落場，容易做到個人化服務同建立長期關係。
- 結業容易：唔想做嘅時候，取消商業登記、清返啲債就得。
壞處喺邊？
- 無限債務責任：企業還唔到嘅債，要攞東主嘅私人財產去還。
- 資金有限：本錢淨係得東主一個人嘅積蓄同借貸能力，好難擴充。
- 借錢難：規模細又冇抵押品，銀行未必肯批貸款。
- 企業壽命短：東主一過身、退休或者破產，間企業喺法律上即刻終止。
- 一腳踢：入貨、賣嘢、計數、請人全部一個人做，冇專業分工，壓力亦都大。
- 規模細、成本高：入貨量少，攞唔到大手折扣，好難同連鎖店鬥價錢。
企業壽命（Continuity）：獨資企業喺法律上同東主係同一個人，所以東主過身、退休或者破產嗰陣，企業就即刻終止，冇所謂永續經營。
考試點問？經營形式呢個課題，DSE 最典型嘅問法係比較：解釋一種經營形式相對另一種嘅優點或者缺點——例如「試解釋獨資經營相比合夥經營嘅兩個優點」，又或者情境入面有東主打算將獨資生意轉做私人有限公司，叫你解釋轉變帶嚟嘅好處或者壞處。答呢類題，每一點都要寫成比較句先有分：唔好淨係寫「成立簡單」，要寫「獨資經營嘅成立手續同成本比有限公司少」；唔好淨係寫「有風險」，要寫「獨資東主承擔無限債務責任，私人財產都可以被追討，而有限公司股東嘅責任以出資額為上限」。仲有兩個提醒：第一，寫明「同邊種形式比較」，冇咗個比較對象，優點缺點就唔成立；第二，每點講完都要扣返情境——盤生意嘅規模、本錢、風險——先攞得齊分。
獨資經營嘅好處同壞處，其實成日都係同一個原因嘅兩面：因為得一個人，所以又快又自由；亦因為得一個人，所以又細又危險。想解決資金同風險呢兩個問題，最直接嘅一步就係搵多個人夾份。下一篇我哋就會講合夥經營（Partnership），睇下多咗個拍檔之後，邊啲問題會好返，而邊啲反而會走出嚟。記得留意我哋嘅blog啦。
如需轉載，請電郵至 [email protected] 查詢。