上篇我哋定義咗成本、機會成本，亦都講咗理性決定即係邊際利益大於或等如邊際成本嘅決定。不過定義識背係一件事，考試要你攞住佢去答一條題目就係另一件事。今篇我哋就用兩個日常例子同一條公開試常見嘅問法，示範成本同利益實際上點樣用。
應用嘅時候，我哋唔會一次過將兩堆數字擺埋一齊比較，而係一步一步咁做：第一，列出所有選項；第二，量度每個選項嘅利益同成本；第三，逐一單位咁比較，只要邊際利益（Marginal benefit）大於邊際成本（Marginal cost），就繼續落去。最後嗰句係最多同學漏咗嘅——經濟學嘅決定好少係「做定唔做」，多數係「做到邊個數量為止」。
邊際決策法則：逐單位比較邊際利益與邊際成本，直至兩者相等為止。1. 邊際利益大於邊際成本：增加該單位，淨利益上升。2. 邊際利益小於邊際成本：減少該單位，淨利益上升。
第一個例子。小明考慮報幾多堂補習，每堂學費 $300，即係每多上一堂嘅邊際成本都係 $300。至於邊際利益，我哋用佢最多願意付幾多錢去量度：第一堂由乜都唔識到識條公式，佢願意付 $700；第二堂 $500；第三堂 $300；第四堂開始重複，佢只願意付 $150。逐堂比較：第一堂 $700 大過 $300，上；第二堂 $500 大過 $300，上；第三堂 $300 等如 $300，啱啱好，上；第四堂 $150 細過 $300，唔上。所以小明應該報三堂。
上圖將四堂嘅邊際利益連埋一齊，就係一條向下傾斜嘅線；每堂學費一樣，邊際成本就係一條 $300 嘅水平線。兩線相交嗰點就係三堂，亦即係最佳消費量。留意第三堂嘅邊際利益啱啱等如邊際成本，上與唔上其實無分別；而第四堂已經蝕本，多上一堂反而令淨利益跌 $150。
最佳消費量：邊際利益等如邊際成本時的消費量，此時淨利益達到最大。
第二個例子唔係問「做幾多」，而係「二揀一」。阿May 暑假可以做兼職，又可以報一個暑期課程，兩者時間相撞，只可以揀一樣。兼職嘅利益係人工 $12,000，顯性成本係車費同伙食共 $1,000。課程嘅利益係佢學到嘅嘢，佢自己衡量最多值 $9,000，顯性成本係學費 $4,000。
淨利益：一個選項的利益減去該選項的顯性成本。1. 在互相排斥的選項之中，理性的人會選擇淨利益最高的一個。2. 被放棄的選項之中最高的淨利益，就是所選選項的隱含成本。
用淨利益比較：兼職係 $12,000 減 $1,000，即 $11,000；課程係 $9,000 減 $4,000，即 $5,000，所以應該做兼職。另一個做法係用返上篇成本嘅定義：做兼職嘅成本等於顯性成本 $1,000 加隱含成本（即放棄咗嘅課程，佢嘅淨利益 $5,000），合共 $6,000，而利益係 $12,000，利益大過成本，同樣應該做兼職。兩個做法一定得出同一個答案，連個差額都一樣：$11,000 減 $5,000 同 $12,000 減 $6,000 都係 $6,000。答題時揀一個講到底就夠，最忌兩樣溝埋——將放棄咗嘅課程當成本計一次，跟住又攞去同課程比多次，咁就重複計數。
最後係公開試嘅問法，題目通常係咁：一間茶餐廳而家每晚十點收工，如果延長營業一個鐘，額外收入 $800，額外要俾嘅人工同電費共 $600，問應唔應該延長？好多同學會答「因為茶餐廳有錢賺」，攞唔到分。要攞分嘅答法係：延長一個鐘嘅邊際利益 $800 大過邊際成本 $600，所以應該延長；而且應該一直延長落去，直至多開一個鐘嘅邊際利益等如邊際成本為止。題目問邊際，就唔好攞總數去答。
睇到呢度你可能會問：如果茶餐廳今年已經俾咗成年租，嗰筆租金計唔計落成本度？下篇我哋就會講沉沒成本（Sunk cost）——一種喺理性決定入面永遠都唔應該計嘅成本。
詳情：DSE 經濟補習課程
如需轉載，請電郵至 [email protected] 查詢。